تفاصيل المدونة

5 نصائح هتساعدك تشتغل وتعلي إنتاجك من البيت !

  • بواسطة : Manar Fathy
  • 2020/06/22

إحنا عارفين قد إيه صعب تركز وسط كل الإغرائات اللي جنبك دايماً في البيت! و الصوت اللي دايماً بيقولك ساعة كمان نوم مش هاتفرق، هنبدأ بس بعد حلقتين كمان.. و غيرة، عشان كده جمعنالك شوية نصائح بسيطة و عملية غيرك جربوها و أكيد هاتفرق معاك لو انت قاعد في البيت! 

إختار المكان المناسب!

 إختار مكان ثابت تنجز فيه اللي عليك يومياً من بيتك سواء شغل أو مذاكرة أو كورسات بتاخدها. يُفضل مايكونش المكان جوه أوضة النوم! أو على الأقل مايكونش سريرك عشان أنت متعود أنه مكان راحة ممكن متقدرش تركز فيه. و هيأثر عليك جداً لو خليت المكان  منظم، النظام ده هيساعدك تركز أكثر و إنتباهك ميكونش مشتت. 

خلي فيه خطة للي عايز تخلصه

لما تكون لوحدك في البيت يومك دايماً مبيكونش ليه خطة والوقت مبيكونش محدد هاتعمل إيه إمته، زي خطتك اليومية و انت خارج من البيت. عشان كدة ورقة صغيرة فيها الخطوات وايه المطلوب إنجازه ممكن تساعدك تنجز في يومك و تعرف هتستفيد منه في ايه.

بس متحطش 100 حاجة في يوم واحد، لو لسه بتبدأ خاليها بسيطة مكونة من 3 أهداف مثلاً، وحط أولوية للي محتاج يخلص الأول، عشان لو زودت مش هاتقدر تخلصهم كلهم و هاتُصاب بالإحباط وده عكس المطلوب. :)

ابدأ يومك بنشاط

لو خليت ليك روتين ثابت وبسيط زي الصلاة، وجبة الفطار يومياً، أو حتي رياضة بسيطة، هيأثر على طاقتك و العقلية اللي هتشتغل بيها و هتقدر تكون منتج أكثر يومياً لو إلتزمت بيه كل يوم من البيت. :) 

سلي نفسك و إسمع موسيقى!

خد بالك إن اللي بتسمعه بيأثر عليك، ممكن نتجه للكلاسيك أو الألات والموسيقي ممكن تساعدك علي التركيز أكثر ! :)  

كُن ممتن و متلومش نفسك

وبنفكرك إن في الأخر الوقت ده صعب على الجميع، مش محتاج تلوم نفسك لو ما أنجزتش اي حاجة من خطة يومك. كل واحد ليه طريقة شغل و تواصل مع اللي حوالية مختلفة دايما، عشان كده في أشخاص منتجين و ممكن يركزوا أكثر من البيت. والعكس صحيح، عشان كدة ممكن ننصح باستمرار التواصل مع أصدقائك.

  أصحي و حاول تاني، ده يوم جديد، و إرمي اللي فات ورا ضهرك. و خليك ممتن دوماً لأي وضع، شعور الإمتنان هيساعدك دايماً و هيديك طاقة للإنجاز! :)

 

موقع بارك بيتمنالكوا السلامة والأمان و بننصح بالتواجد في البيت دايماً إلا عند الضرورة. :)

لو حابين تقرأوا أكثر عن الأنتاجية من البيت المقالات ديه هاتفيدكوا:

https://bit.ly/3hIcmty

https://bit.ly/2AE1AnO

سيبولنا أرائكم في التعليقات وهل فيه موضوع حابين نتكلم عنه المرة الجاية؟ :)

 

  

.
  • علامات :
  • work from home، العمل من المنزل، 2020
  • خليك في البيت، productivity
  • كورونا
  • عقارات
  • real estate
  • نصائح للعمل من المنزل
  • egypt